مہر نے لفافہ نہیں لیا۔ ’’اب واپس کرنے کی ضرورت نہیں۔‘‘ ارسلان نے اسے چھت کی منڈیر پر رکھ دیا۔ ’’واپس نہیں کر رہا۔ پوچھنا چاہتا ہوں، یہ مجھے بھیجا کب تھا؟‘‘ مہر کو غصے سے زیادہ حیرت ہوئی۔ ’’جانے سے ایک دن پہلے۔ آپ کے گھر پہنچانے کے لیے ثنا بھابھی کو دیا تھا۔‘‘ ’’مجھے تین دن پہلے ملا ہے۔‘‘ نیچے سے ڈھولک کی آواز آئی، پھر کسی نے قہقہہ لگایا۔ چھت پر کھڑے دونوں لوگوں کو وہ آوازیں بہت دور کی لگیں۔
لفافے میں کوئی لمبا اظہار نہیں تھا۔ صرف یہ سوال تھا کہ کیا ارسلان کبھی اپنے گھر والوں کو مہر کے لیے بھیجنے کا ارادہ رکھتا ہے، یا ان کی دوستی کا مطلب مہر نے غلط سمجھا ہے۔ جواب نہ آنے پر مہر نے خود ہی ایک جواب مان لیا تھا۔ اس کے بعد ارسلان کے دو مختصر پیغامات بھی اسی خاموشی میں گم ہو گئے۔ ’’میں نے تمہیں لکھا تھا کہ پہنچ گیا ہوں،‘‘ ارسلان نے کہا۔ ’’میں نے سمجھا آپ رسمی بات کر رہے ہیں۔‘‘ ’’میں نے سمجھا تم بات ختم کرنا چاہتی ہو۔‘‘
مہر کی آنکھیں بھر آئیں، مگر وہ روئی نہیں۔ ’’اتنے برس میں ایک بار پوچھ نہیں سکتے تھے؟‘‘ ارسلان نے سر جھکا لیا۔ ’’پوچھ سکتا تھا۔ اپنی انا کو تمہاری مرضی سمجھ لیا۔ یہ میری غلطی تھی۔‘‘ پہلی بار مہر کو اس سے کوئی صفائی نہیں، صاف جواب ملا تھا۔ مگر لفافہ چار سال کہاں رہا؟ یہ سوال ابھی باقی تھا۔
